– کورتە چیرۆکی: محەمەد ئۆسۆ
– بەو هیوای وەرگێڕانەکەی بۆ کوردی چاک بێت
زوهێر خوێنەوارێکی گوندەکەی خۆیانە و حەزێکی زۆری بۆ هونەر و هەموو بابەتە هزرییەکان هەیە. لەگەڵیدا هەمیشە بەهۆی نەمانی باوک و دایکییەوە، نازێکی زۆری ئاواییەکەی بەسەرەوەیە. ئەم جیهانە بۆ ئەو هەموو حەز و ویستانەی هێشتا بچوکە. دەیەوێت بگات بەو پیشە و شوێنەی، کە پاڵەوانی ڕۆمانەکان زۆرجار تیایدا دەگوزەرێن بۆ چەندین سەدە. سەری خۆی هەڵدەگرێت و دەچێتە شام! شامی شارستانی و مۆدی کەشخە و ناوەڕۆکی چێژ و ویستەکانی. لەو شارەدا زۆر تێناپەڕێت، زوهێر تێدەگات، کە خەیاڵ پڵاوێکی مەست بووە. ئیتر بەرە بەرە دەگاتەوە هەمان دۆخی گوندەکەی خۆی. ئەو پارەیەی، کە لەگەڵ خۆی هێنابووی دەداتە کزی. لەلای پیرەژنێکی داماو ژووری گرتووە و هەمیشە نەگبەتی و بێبەختی خۆیان بۆ یەک دەگێڕنەوە. زوهێر دەیەوێت بڕواتەوە و چەشە بووە لە هیوابڕاوی و دەردەسەری و شکست. دەچێتەوە وێستگەی شەمەندەفەر و لەوێ تەماشا دەکات، ئەو پارەیەی پێی ماوە بەشی سواربوونی ناکات. دەچێت ها لێرە ها لەوێ لە قومسێری ئەوێ یاخود جابییەکان بپاڕێتەوە، کە بە هەموو شوێن ڕازییە و تەنها سەری بخەن.
جابی بەزەیی بە زوهێردا دێتەوە و دەڵێت: من ناتوانم سەرت بخەم لەگەڵ گەشتیاراندا. بۆیە چاوپۆشیت لێ دەکەم لە فارگۆنی بەفرگر سەرکەوە. بەختی تۆ هیچ خۆراک و شتی تێدا نییە. زوهێر لەسەرخۆ خۆی دەتەپەێنێتە ژوورەوە و نقە لەخۆی دەبڕێت.
شەمەندەفەر دەڕوا و فارگۆنێکی ستیلی چۆڵە. نە سەعاتێکە نە دوان و زوهێر وەڕس دەبێت. کاتێک دەچێت گڵۆپەکە داگیرسێنێ، بەو پێیەی ترسی هەستپێکردنی نەماوە. لەپڕ تابلۆکە دەبینێت، کە نوسراوە ”تاکو ٢٨ پلەی ژێر سفر دەیبەستێت.تکایە دەرگا دوای خۆت دابخە”. ئەم ئیتر دادەنیشێ و بەرەبەرە هەست دەکات سارد دەبێت. هەڵدەستێ و بەئەسپایی لە دەرگاکە دەدات. بەڵام ئەفسوس لەو ژاوەژاوە و هاڕەیە کێ دەیبیستێ. تابێت توندری دەکات و هێواش هێواش شڵەژاوتر دەبێت. نە پەنجەرەیەک نە کونێکی دەرەوە هیچ هیچی نییە.
دوای ٥ سەعات شەمەندەفەر دەگاتە حەڵەب. جابییەکە کاتێک دەرگاکە دەکاتەوە،تاکو بەدزییەوە دایبەزێنێت زەندەقی دەچێت. زوهێر بووە بەتەختە و هیچ ناجوڵێت. ئیتر لەتاوا هاوار دەکات و خەڵک و قومسێر کۆدەبنەوە. پاش نیو سەعاتێک ترومبێلی فریاکەوتن دەگات. کابرای شۆفێر شەمەندەفەرەکە ئاگرەکەی دادەخات و دەڕواتە نزیکی جابی. جابی بە ترس و لەرزێکەوە دەڵێ: تۆ بڵێ پۆلیس نەیدۆزێتەوە، کە من چاوپۆشیم لێ کردووە و ڕەقبۆتەوە؟ بڵێی لە سێدارە نەدرێم لەسەر ئەو کوشتنە ئەنقەستە؟ شۆفێرەکە بەسەرسوڕمانەوە دەڵێ: بۆ ڕەقبۆتەوە لەسەرما؟
٠ ئەی چی هەی قوڕ بەسەرم!!
— نا کاکە، ئەو فارگۆنە هەفتەیەکە هەر ماتۆڕی سارکردنەوەی دەرکراوە و نێردراوە بۆ چاککردن. خوا دەزانێ کەی دێتەوە!!
گەلانی ڕۆژهەڵات لە زوهێر دەچن. وەهمێکیان دروستکردووە بەناوی سەرکردە و دەستڕۆیشتوو و گوایە هەموو دنیا لەگەڵیانە دژیان. بەڵام ئەسڵدا ”ماتۆڕیان” هەر پێوە نییە. تەنها کۆمەڵێک سەرسەری و بنەماڵەی چەتەن!

سەگێکی هار:

بنکەی پۆلیسە و کاکی بەڕێوبەر و یاریدەدەرەکەی قنج خۆیان گۆڕیووە و بسکەی سمێڵیان دێ. تازە موچەی مانگی پێش پێشووتریان وەرگرتووە. شار خامۆشە و هەموو شت بەپێی تەلی دادگا دەسوڕێ. لە سەریانەوە تەرازوویەک دانراوە و ژنێکی چاوبەست گرتویەتی بەدەستیەوە. لەسەر ئەویشەوە وێنەی جووت سەرکردە دانراوە.
یاریدەدەر: جەناب، باشتر نییە نیشانەی داد و یەکسانی لەسەرو وێنەی جووت سەرکردەوە بێت؟ چونکە هەردووکیان پارێزەری داد بوون و مەعالیان هەمیشە جەختیان لە دادپەروەری دەکردەوە.
بەڕێوبەر: من چەن دەتکەم بە ژێر سک، بەڵام تۆ هەر دەبیت بە پاڵدو*. ئاخر نازانی گەر هەردووکیان نەبان، نە ئازادی نە داد و نە ئەم وڵاتەش دەبوو. کورە من و تۆش بە رەزای ئەوان لێرەین.
یاریدەدەر: ئەها، وەڵاهی ئینسان تا دەمرێت هەر فێری حیکمەت و مەنتق دەبێت لە جەنابتەوە. تۆ سەیری سەیری من چیم بیرچووە. تکایە بمانبوورە بە گەورەیی خۆتان.
بەڕێوبەر: گرنگ ئەوەیە تۆش بیگەیەنیت، وەکو دەزانیت ئێمە مستی دەستی دادپەروەرین لەم شارە.
لەپڕ غەڵبە غەڵبێک دێت و هەرایەک لە قاوشی بەردەمیان وا نزیک دەبێتەوە. هونەر، کە پۆلیسێکی جێگیرە لە بەڕێوبەبەرایەتی بە بڕوانامەی ٦ـی بنەڕەتییەوە. لەشێکی پتەو و قیافەیەکی هەیە، کە نایەڵێت ئەو حەشامەتە بگەنە لای ژووری بەڕێوبەر. بەڕێوبەر و یاریدەدەر بە سەرسوڕمانەوە بۆ یەکتری لە دەرگاکە نزیک دەبنەوە و دەیکەنەوە.
– ها هونەر ئەم گەڕەلاوژێیە چییە؟؟ (زیاتر…)