کەحلان …

نووسەر: Sia

  • ڤیستیڤاڵی نێودەوڵەتی – نوسینی: #عەزیز_نەسین (کوردێنراوە)

    هاوپیشەکارانی ئەزیز و لیژنەی ئامادەکاریی بۆ گەورەترین ڤیستیڤاڵی نێودەوڵەتی. زۆر گرنگە ڕووی گەل و ناوچەکەمان سوور بکەین لە نێو میللەتانی تر بۆ بەرهەم و پیشەسازی. وە جێگای خۆیەتی باشترین بەرهەم نمایش بکەین. جا دەمەوێت بزانم ڕای ئێوە و پێشنیازتان؟
    – دکتۆر موزەفەر (دکتۆرا لە وزە و خەرجی ناوەکی): گەورەم من دەڵێم هەندێک گڵۆپ و شقارتەی خۆماڵی دابنێین؟
    * ئەی دەمخۆش، بەڵام لێیان دەنوسین: ” تکایە دایمەگرسێنە و دەستی لی مەدە” خۆت دەزانی زۆریان بەتازەیی ئیش ناکەن!
    – دکتۆر عارف (دکتۆرا لە جۆرایەتی کەلوپەل و پۆشاک): گەورەم چۆنە گۆرەوی و تراکسۆدی کارگەی چنین و پۆشاکی شارەکەمان بنێرین؟
    * تۆش دەمخۆش، بەڵام لێیان دەنوسین ”تکایە بۆ لەبەرکردن و دەستلێدان نییە”. چونکە خۆمان دەزانین یەکسەر دەدڕێن!
    – دکتۆرە سەعادەت (دکتۆرا لە مەقامی میللی و قەتار): من پێشنیار دەکەم بە ناردنی هەندێک خەنجەری دەبان بەمسکی عەنبەر و شاڵی مەرەزی خۆمان و تەسبیحی ئەبڵقەق و کڵاشی هۆرامی، کە چەپ و ڕاستی نییە و جێگای بایەخی گەلان دەبێت.
    * بەڕاستی خانم زۆر بەجێیە. ئێستا بە لیژنەی کڕین دەڵێم: بڕۆن باشترین خەنجەر و تەسبیح و شاڵ بەرن.
    (پاش تەواوبوونی ڤیستیڤاڵ و هاتنەوەی وەفد بە سێ ڕۆژ)
    – ڕووداو: گەلانی دنیا بەو کبریتەی لەلایەن سەرۆکی حکومەتەوە بەردی بناغەی دانرا سەرسام بوون.
    – کوردسات: ئەو کارگانەی بە هیمەتی سەرۆک کۆمار کرانەوە، ئێستا بەرهەمەکانی دەچنینەوە.
    – سبەی: گەرچی کێشەی گەندەڵی هەیە، بەڵام پشتگیری شاڵ و کڵاش و تەسبیح لەدەرەوە وەکو کورد ئەرکمانە وەکو ئۆپۆزسیۆن.
    (لیژنە و یاوەرانی ڤیستیڤاڵەکە لە ژووری بەڕێوبەرن دوای سەفەر)
    ئادەی پێم بڵێن: چۆن بوون، چیتان کرد، چەند خەڵک هات بەوردی دوور لە مێدیا و ناونیشانی حیزبی؟
    – ڕاستی گەورەم، شقارتە و گڵۆپ و گۆرەوی و کراسەکان هەر لە بارکردن و داگرتن دڕان و تێکچوون. بەڵام زۆر حەیف خەنجەر و شاڵ و ئەبڵەقەکەش بەهۆی گرانیانەوە دزران هەر کاتی نمایش وە کڵاشەکەش کە ئەوناوەیان شۆری، تێکچوو!
    * ئەی لەشیان داڕزێ ئەرێوەڵا، سەیر سەیری ئەو وڵاتە پێشکەوتوانە بکە چۆن تێکچوون. خۆزگەمان بەلای خۆمان!
    – گەورەم ڕاستی نەدەبا ئەو شتە بەنرخانە بنێرین
    * گوێی مەدەرێ، شاڵ و کڵاشەکە هی چینە و خەنجەرەکەش دەسکەکەی باغە و تەسبیحەکەش لە ژێر پردەکە لە مناڵمان کڕیووەتەوە. موهیم ڕووی گەلەکەمانە لەنێو گەلانی تر. بژین

  • مشکی خۆخۆر – عەزیز نەسین

    لە شارێکی نزیک دەریادا، کۆگایەکی گەورەی خۆراک دەبێت. ئیتر وەکو هەموو کۆگایەک مشکی بۆ دێت. بەڕێوبەری کۆگاکەش لەڕێگای ژەهرەوە خەریکیان دەبێت. بەڵام تاکو مشکێک بە ژەهر دەکوژێت، ئەو ٢٠ مشکی خستۆتەوە. مشکەکان بەرەبەرە هەرچی فەردە ئاردە دەیکەنە هێلانە و هەرچی پەنیز و گەنم و جۆیە شەوان دەیکەنە یاری بۆ خۆیان. قەبارە و هێزیان وای لێ دێت، ئیتر ئینسان ناتوانێت شەوان بێتە کۆگاکە.
    بەڕێوبەری کۆگاکە هەڵدەستێت کۆمەڵێک پشیلەیان بۆ دێنێت، کە ناسراون بەچەموشی و لێزانی. دەی دوای هەفتەیەک مشکەکان بەتاکتیک هەموویان دەکوژن. بەڕێوبەر هیچی بۆ نامێنێتەوە بێجگە لە شیوەن و واوەیلا لەم دۆخەی تێیکەوتووە و چی بەسەر هاتووە. ڕۆژێک بیری بۆ لای پلانێک دەچێت، دەستبەجێ سێ قەفەسی گەورە دەبات بۆ ناو کۆگاکە و دەرگاکانی دەکاتەوە. مشکیش لەبەر قەرەباڵغی پڕی دەبن. تەنها دەرگاکەیان لەسەر دادەخات. دەی ڕۆژێک و دوو ڕۆژ ئیتر مشکەکان دەیکەنە شەڕ ناو قەفەسەکە. برسێتی و جێگا تەنگی زۆریان بۆ دەهێنێ. ئیتر دەستدەکەنە یەکتری خواردن. دوای هەفتەیەک کەم دەبنەوە و ئیتر کەسیان متمانەیان بەکەسیان نامێنێ. هاکا یەکێکیان نوست لەسوچێکدا و ئەمەی تر برسیشی نەبێت، دەچێت دەیخنکێنێ. تا حاڵ وای لێ دێت دوای ٤ هەفتە هەر قەفەسەی یەک دانە مشک ماوەتەوە. مشکێکی دڕەندە، بەهەیکەل، تەڵەکەباز و دڕ و خێرا. چونکە بەهەرچی ئەزموندا ڕۆشتووە. بەڕێوبەریش ئەنجا دەرگایان بۆ دەکاتەوە و بەجێیان دەهێڵێ. ئەم مشکانە ئیتر دەستدەکەن بەخواردنی ئەوەی برسیانە، وە کوشتن و خنکاندنی هەرچی نەوەی نوێ و بچکۆلەیە. وە ڕاونانی ئەوەی دەستیان پێ ناگات.
    پاش دوو مانگ هیچ مشکێک نامێنێتەوە و بەڕێوبەرەکە بەم پلانە شەیتانیەی کۆتایی بەگەورەترین کێشەی کۆگای ئەو شارە هێنا. بەڵام دەزانن بەڕێوبەر چۆن مێشکی بۆ ئەم پلانە چووە؟
    چونکە خۆی ئاوها لەسەر خواردنی دەوروبەری، خنکاندنی نەیارەکانی و داپڵۆسین کۆمەڵگا و وەچەی خۆی بوبووە جەنابی (گەورە و بەڕێوبەر)

  • دز و حیزمان دەوێت – عەزیز نەسین

    کوڕێک تازە خوێندن تەواو دەکات و ناوی بەژمێریار دەردەچێت لە کوێرە ناحییەکی دورە جادە. یەکەم ڕۆژ بەڕێوبەری ناحیە پێشوازی دەکات. دەرگاکەی کراوەیە و هەرکەس دێتە لای کارەکانی بۆ دەکات. ڕێک دوای ئەوەی دەردەچن لەلای بەڕێوبەر، شکاتێک دەدەنە کوڕەی تازە ژمێریار. یەکێکیان دەڵێ: ئەم موعامەلەی بۆم کرد، بەو مەرجەی کچەکەمی بدەمێ. یەکێ تر دەڵێ: ڕەزامەندی دا لەسەر هەڵکەندنی بیر بەو مەرجەی ٣ لیرەی ڕەشادی بدەمێ. یەکێکیان دەڵێ: بۆمی کرد، بەو مەرجەی بەربەنیوەی مەڕەکانی ئەمساڵی بدەمێ. گشتی لەلای ژمێریار دەردەچن تف و نەعلەتی دەکەن. ژمێریاش واقی وڕدەمێنێ زۆر، خوایە هەموو ئیشیان بۆ دەکات و قسەی خۆشە. بۆ داوای بەرتیلیان لێ دەکات؟
    ئەمیش دەڵێ مادام بەرتیل وەردەگرێت و شکاتەکانم لەدەستە دەچێتە لای. بە بەڕێوبەر دەڵێ: گوێ بگرە تۆ ئەم هەموو بەرتیل و بێئەخلاقییە دەکەیت. یان ئەوەتا شەریکم دەکەیت یان ئەوەتا شکاتەکان دەگەینمە پایتەخت قەت لێی دەرناچیت.
    بەڕێوبەریش دەڵێ: منەتت نەبێت بیگەیەنە!
    ژمێریارەکەش دەچێتەوە ژورەکەی خۆی سەری لەم بێمنەتیەی بەڕێوبەر دەرناچێت. لەپڕ چایچییەکە دێت ژوورەوە دەڵێ:
    کوڕم شکاتەکان بگەیەنە. ئێمە هەر بەڕێوبەرێکمان بۆ دەهات کوڕی چاک. دەوڵەت دەریدەکرد. وا ١٥ ساڵە ئەم بەڕێوبەرەمان هەیە زۆر لێی ڕازین، بەڵام دوای هەموو ئیشێک درۆیەکی بۆ هەڵدەبەستین و شکاتی لێ دەکەین. قەت دەستیان لێ نەداوە.
    دەرکەوتووە بۆمان: دەوڵەت پیاوی حیز و دزی دەوێت. جا بەقوربانە بیانگەیەنە

  • داهۆڵ (کورتە چیرۆکێکی پڕ مانا و قوڵ)

    داهۆڵ (کورتە چیرۆکێکی پڕ مانا و قوڵ)

    نوسینی: جوبران خەلیل جوبران
    لەعەرەبیەوە وەرمگێڕاوە
    شەوێکی تاریک لە دەشتێکی چۆڵدا لە داهۆڵێکم پرسی: ئەرێ تۆ بێتاقەت نیت بەم ژیانە؟ تەنها و بێکەس لەم دەشتەدا؟ غەریبی کەس ناکەیت؟ وەڕس نابیت؟
    داهۆڵ وتی: نەخێر، دەزانی چەند کەیف و سەفا دەکەم. هەرچی چۆلەکە و مەلە، کە دەمبینن لێم دەترسن و دوور دەفڕن .
    وتم: خۆ ڕاستە، دەزانی خۆشە. ئاوها بوەستیت، خەڵکی لێت بترسن. هەستێکی زۆر بەچێژە، دەبێت تاقی بکەمەوە.
    داهۆڵ وتی: نا، نا، وەکو تۆ ناتوانێت دڵی بەو شتانە خۆش بێت. ئەوە بۆ من چێژی هەیە، کە سەرم پووشی تێدایە. وە قۆڵەکان و ئازای گیانم تەختەن

  • بیرکردنەوە لێت

    بیرکردنەوە لێت شتێکی جوانە
    بیرکردنەوە لێت، هیوایە
    وەکو گوێگرتنە لەخۆشترین گۆرانی
    بەنایابترین هۆنراوەی دنیاوە
    بەڵام چیدی نە هیواخواستن دادم دەدا
    نە گوێگرتن لەگۆرانیش دڵخۆشم دەکا
    بەڵکو دەمەوێت خۆم گۆرانی بڵێم

    – لە تورکیەوە (نازم حیکمەت)

  • هەندێ ڕاستی لەسەر ئەم چەکانەی، کە گوایە دێت؟!

    دوور لە میدیای درۆزنی کوردی، کە تا ئێستا حەقیقەتی ئەم پارچە چەکانەی ئەڵمانیان نە وتووە. چییە؟ هی کەیە؟ بۆ جەنگی داعش و ڕێگرتن لە داعش بۆ پێویستە؟
    پێش هەموو شتێک، شتەکان جارێ لە پرۆسەی بینێرن/نەینێرن/چۆن/چیدان؟ نەک ئەوەی وا لە بەرەکانی جەنگدا چەکی ئەڵمانی هەبێت. جا بۆ ڕوونکردنەوە و تێگەشتنێکی سەرەتای لەسەر وردەکاری چەکەکان و تواناکانی. ئەمە هەندێک لەو پارچانەی کورد داوای کردووە (وە جەختی لێ کردۆتەوە) بریتین لە

    ڕاکێتی (میلان)

    کە توانای هەیە لە دووری 2 کیلۆمەترەوە زریپۆش ببڕێت. ئەمەش پێویستی بە شارەزا/پسپۆر و ڕاهێنانی هێزی پێشمەرگەی کوردییە. ئەڵمانیاش نایەوێت پسپۆری خۆی بنێرێت.

    پرسیار ئەوەیە:زریپۆش و لە دووری 2 کیلۆمەترەوە، چەکی سەرکەوتووە دژی داعش؟ ئایا هاوشێوەی ئەو چەکانە نییە و چی لە تەکنیکی شەڕ و ئەگەری سەرکەوتن دەگۆڕێت بۆمان؟ لە حاڵەتێکدا، چەکدارانی داعش بە ترومبێلی ئاسایی و جلوبەرگی ئاسایی زۆرکات لەبەر گەرما (نەعل) لەپێن!

    تێبینی: لە لایەن سوپای فەرەنسی و ئەڵمانییەوە لە 1963ــ هەیە و بە دەیان وڵات فرۆشراوە لەوانەش وڵاتانی کرۆکی داعش وەکو سعودیە، قەتەر، بەحرەین.


    چەکی دەستی G36

    ئەمەش یەکێکە لە داواکارییە دڵخوازەکان. کە ئامێرێکی کۆمپانیای هێکلەر و کۆخ ـی ئەڵمانییە و مێژووەکەشی دەگەڕێتەوە بۆ ساڵی 1990. ئەم چەکە سووکە گوللەی جۆری  7.62×51mm ناتۆ دەخوات.جۆرێکی پێشکەوتووترە لە چەکی سووک کە شانەی 30 گوللەیی دەگرێت. بە خێرایی زیاتر دەیانەتەقێنێ (سیستەمی سەللی).

    چەکی دەستی MG42

    ئەمەیان پێشمەرگە واتا کورد جەختی لە وەرگرتنی کردۆتەوە. کە هاوپۆلی ڕەشاسی BKC بیەکیسییە و مێژووەکەی دەگەڕێتەوە بۆ ساڵی 1942 لە شەڕی نازییەکان. شایانی باسە ئەمە لە سەردەمی شەڕی پێشمەرگە و ڕژێمدا، لە هاوپۆلی قورسی/گرانی و کەم فیشەکی (ڕەشاش ژێرسەیە). کە چەکێکی ناحەز بوو لای پێشمەرگەی سەردەمی شاخ.

    کڵاشینکۆفە حەیاتەکە AK-47 

    لە کۆتاییدا حکومەتی ئەڵمانیا لەگەڵ بولگاریا لەو بیرەدان، کە فایزی چەکی سووکی ئەو وڵاتە لە کڵاشینکۆف بدرێتە پێشمەرگە بۆ بەرەنگاربوونەوەی داعش!! زیاتر دەربارەی ئەو چەکە نانوسم، چونکە هەر منداڵێکی کورد لە بیر و هزریدا، ئەم چەکە پارچە بە پارچەی هەڵکۆڵراوە. 

    پرسیارەکان هەموویان ئەوەن، کە لەسەرەوە دەکرێن:

    ئێمە بۆ بەرەنگاری داعش و بەربەستکردنی ئەم چەکانەمان پێویستە؟ ئایا لەو چەکانە سەدان قات باشتر و چاکترمان نییە؟ ئەی تەکنیکی ڕادار و زریپۆشی زیرەک و مینهڵگرەوە؟ لە کاتێکدا نیوەی شاخەکانی کوردستانی کردووە بە دۆزەخ بۆ هەر نییە؟ ئەی ڕاهێنانی کورد بۆ فڕۆکەی جەنگی و دانی هەلیکۆپتەری وشیار و فڕۆکەی بێفڕۆکەوان بۆ نییە؟ کە ئەمریکا و ناتۆ تەنها ئامرزایانە بۆ بەرەنگاربوونەوەی قاعیدە و داعش لە وڵآتان؟ یان کۆمەڵگای کوردی و ناوچەکە بە گشتی، لەم کاتەدا ئەم هەموو چەکە سووکە بۆ چییە؟ بە پێی کام ئامار و وردەکاری وەزارەتی پێشمەرگە، نوقسانی ئێمە ئەمانەن؟ هەر بە پێی ڕوونکردنەوەی سەرۆکایەتی هەرێم بێت، هۆی شکستی پێشمەرگە چەکە پێشکەوتووەکانی داعش بووە لەو ناوچانە! ئا ئەمانە چەکی پێشکەوتوون یان هی نیوسەدە پێشترن؟ هەروەها چەندین وڵاتی ئیسلامی چەندین ساڵە هەیانە. ئەمانە پڕچەکردنی پێشمەرگە و کوردن یان ساغکردنە و فڕێدانی زبڵی مەخزەنەکانیانن؟ 
    پرسیارەکان لای خۆتان بهێڵنەوە، ڕۆژگار زۆر شتی تر لەم گەمە نابووتە هەڵدەماڵێ.
    پەراوێز:
    ڕاپۆرتێکی دێر شپیگلی ئەڵمانی لەسەر وردەکاری چەکی ئەڵمانیا بۆ کوردەکان
    http://www.spiegel.de/politik/ausland/irak-welche-waffen-deutschland-an-die-kurden-liefert-a-987337.html#ref=plista